PANAMÁ, AP.- E famia multimionario di Bangkok, ku a ko-fundá Red Bull, e bibida energisante mas popular na mundu, a usa kompanianan di paraisonan fiskal pa skonde kompra di avion i propiedatnan di luho. Esaki a inkluí un kas enorme na London kaminda e yu fugitivo di e plan a wòrdu mira pa último biaha.
E esfuersonan di e famia Yoovidhya, pa skonde bienes ta mustra ku ta masha fásil pa personalidatnan finansiero transferí míles di miónes di dòler ku masha nada òf sin supervishon.
E tratonan konfidensial di e famia a wòrdu eksponé inatvertidamente pa un miembro di e famia Yoovidhya, Vorayuth “Boss” Yoovidhya, kende no a paresé dilanti di korte vários biaha apesar ku e mester a rospondé na akusashonnan ku el a hui ku su Ferari despues di a dal i mata un polis riba motersaikel na Bangkok.
Outoridat di Tailandia a revoká su pasport i a emití un òrdu di aresto, pero nan no sa tokante su paradero.
E investigashon a desaroyá huntu ku Panamá Papers, un kolekshon di 11 mion dokumento sekreto ku ta mustra kon e famianan mas riku na mundu ta skonde nan fortuna. E areglonan finansiero di famia Yoovidhya ta paresé den e dokumentonan aki.
E dokumentonan Panamá Paper, a mustra ku e famia a usa por lo ménos mei desena di kompania anónimo den paraisonan fiskal durante mas di dos dékada.
