PANAMA, AP.- Panamá a pidi Merka formalmente pa ekstraditá e eks presidente Ricardo Martinelli pa e enfrentá hustisia den un kaso di supuesto skuchamentu di yamadanan di telefòn di forma ilegal di e opositornan polítiko. Un fuente haltu di gobièrnu di presidente Juan Carlos Varela ku a pidi pa no keda identifiká pasobra e no ta outorisá pa papia públikamente di e tema, a bisa ku e trámite a keda hasí djaluna atardi. E vershon no a keda konfirmá mesora pa embahada merikano na Panamá. E bosero di Martinelli na Panamá, Luis Eduardo Camacho a bisa riba Twitter ku ta trata di un medida di lei. Martinelli di 64 ta enfrentá kargonan pa un petishon di detenshon preventivo di korte supremo di hustisia pa e proseso di denunsia di spionahe telefóniko na un kantidat di persona, entre nan opositornan polítiko, empresarionan, periodistanan i dirigentenan sindikal. Ademas di e presunto yamadanan ilegal ku el a skucha, e eks mandatario derechista a keda akusá di supuesto atkisishon di aparatonan di spionahe pa mas di 13 mion dòler ku fondonan di empresarionan yegá na kontratonan ku su atministrashon i di un programa di ayudo nashonal. E aparatonan a disparsé.
Martinelli kende a goberná di 2009 pa 2014 ta den eksterior for di 2015. Aktualmente e ta biba na Miami. E magnate di e supermerkadonan ta nenga di a spioná su opositornan i a argumentá ku e denunsianan ei meskos ku aktonan di korupshon ta parti di un persekushon polítiko di gobièrnu di Varela.
