SAO PAULO.- Un pareha pober ayera a debolbé mas o ménos 10.000 dòler na polis, ku nan a bisa nan a haña pa kasualidat den un saku di shushi, den e siudat brasileño Sao Paulo, i ku aparentemente a wòrdu hòrtá siman pasá, asina un outoridat a informá.
E pareha tabata kana den un zona di Sao Paulo, ora nan a tende e alarma di un hardware i pa kuriosidat nan a yega te na e lugá i ei nan a haña un maleta chikí i un saku di plèstik yen di plaka, segun Polis Militar a konta.
E pareha a bai serka un bewaker di e lugá i nan a pidié pa e yama outoridatnan.
‘Ora nos a yega, e habitantenan (di kaya) a entregá nos e plaka. Nos ta verifiká ku por ta trata di plaka ku a wòrdu hòrtá di un restorant hapones siman pasá’, asina polis a bisa.
E botin tabata kontené 17.000 real na biyete i 3.000 na monedanan, mas o ménos 10.000 dòler.
E personanan aki, ‘ku ta pasa difikultatnan f inansiero, tabat in e oportunidat di hui ku e plaka, pero nan a yama un bewaker di seguridat i nan a pidi’é pa yama Polis Militar. Loke nan a hasi ta masha digno di elogio’, asina polis a destaká.
Jesús Silva Santos, e hòmber ku a haña e plaka a bisa prensa ku e ta gana 15 real pa dia resiklando shushi.
‘Mi mama a siñami ku mi no mester hòrta i ku si mi mira un hende ta hòrta mi mester avisá polis’, asina Santos, kende ta biba huntu ku su kasá bou di un brùg, a bisa.
