MIAMI, MERKA, AFP.- Senado di Florida a aprobá un lei pa prohibí enseñansa di asuntunan relashoná ku e orientashon seksual òf identidat di género den skolnan básiko, un desishon ku segun su krítikonan por perhudiká e komunidat LGBTI den e estado na sùitost di Merka.
E desishon, aprobá den dos kámara estatal ku mayoria republikano, mester wòrdu aprobá pa e gobernador di Florida, Ron DeSantis, kual ya a ekspresá su sosten pa e inisiativa.
Oposishon demókrata i aktivistanan LGBTI a purba para un proyekto ku yama “Don’t Say Gay” i ku lo wòrdu apliká pa muchanan desde skol di fundeshi te ku grupo 5 kaminda e muchanan tin entre 8 i nuebe aña.
E lei ta prohibí enseñansa di asuntunan relashoná ku orientashon seksual òf identidat di género “di un forma no apropiá pa edat òf desaroyo di e studiantenan”.
E republikanonan ta afirmá sin embargo, ku e proyekto no ta prohibí charlanan spontáneo entre profesornan i studiantenan, pero esaki ta simplemente impedí inklushon di lèsnan tokante e tema den e programa eskolar.