SAO PAULO, AP.- E visepresidente merikano a yega djárason den e region amazóniko di Brasil, pa asina reuní ku refugiadonan venezolano ku a wòrdu obligá pa hui di su pais debí na e krísis polítiko profundo i ekonómiko kual ta afekt’é.
Mike Pence a aterisá na Manaus, kaminda e lo bishitá un refugio kaminda refugiadonan venezolano ta biba.
E dia promé, Pence a anunsiá ku Merka lo duna 10 mion dòler pa yuda e migrantenan venezolano, di kual 1,2 mion lo bai pa Brasil.
Na mes momentu, e gobièrnu merikano ta spera ku Brasil i otro paisnan di e region ta yuda aislá e gobièrnu di e presidente venezolano Nicolás Maduro ainda mas.
Resientemente Maduro a deklará ganadó den elekshonnan ku a wòrdu bòikotiá pa oposishon i ku mayoria gobièrnu estranhero a konsiderá komo ilegítimo.
