CARACAS, AP.- Dos hues nombrá siman pasa pa Asamblea Nashonal entre krítika di Tribunal Supremo di Hustisia a wòrdu detené pa polis polítiko den parti oriental di Venezuela, segun anunsio di Legislashon djamars.
E huesnan Jesus Rojas Torres i Zuleima Gonzalez a wòrdu detené den estado di Anzoategui pa miembronan di Servisio Bolivariano di Inteligensia Nashonal (SEBIN), segun indikashon di Asamblea Nashonal, di mayoria opositor, via su kuenta di Twitter.
E detenshonnan di e dos huristanan a tuma lugá tres dia despues di e aresto di magistrado Angel Zerpa, kende a wòrdu nombrá siman pasa pa Kongreso. Mayoria opositor di Asamblea Nashonal a nombrá i hustamente 13 magistrado i 20 suplente di tribunal máksimo riba 21 di yüli. Esaki tabata un desafio evidente kontra Tribunal Supremo, kontrolá pa ofisialismo. Tribunal Supremo a deklará e akto di e kongresistanan komo nulo i a instruí outoridat sivil i militar pa duna medidanan kontra esnan impliká den e proseso.
Presidente Nicolas Maduro a kuestioná designashon di e grupo di hues aki i a bisa djadumingu ku “un pa un” nan lo wòrdu detené.
E direktor di organisashon humanitario Foro Penal Venezolano, Alfredo Romero, a konfirmá ku un tribunal militar a ratifiká detenshon di Zerpa. E hurista a wòrdu akusá ku delito di traishon kontra patria i trasladá pa un di e sedenan di polis polítiko, kaminda el a keda detené.
