BANGKOK, AP.- Polis tailandes a anunsiá djamars di a konfiská 10 mion dòler di metanfetamina i 37 kilo di heroina skondé den un trùk entre sakunan di fertilisante di galiña.
Kuater persona a wòrdu arestá djadumingu despues di e konfiská di e droganan, segun indikashon di outoridat. E arestonan a derivá debí na e aviso di un informante, segun indikashon di polis den un komunikado.
Den un otro kaso, polis a bisa ku tres persona a wòrdu arestá djasabra i a akusá nan pa poseshon di 2.060 gram di metanfetamina kristal kual a wòrdu kumprá for di un gang di afrikano na Tailandia. Polis a bisa ku e droganan mester a wòrdu trafiká pa klientenan na New Zealand.
Den un terser kaso, polis a konfiská 917 kilo di mariwana djaweps i a arestá seis persona.
Outoridat a mustra e paketenan di droga den un konferensia di prensa den Ofisina di Kombate Narkótiko.
Kada aña, outoridat tailandes ta realisá vários konfiskashon di un mion òf mas tablèt di metanfetamina, i generalmente ta arestá e trafikantenan i shofùrnan di nivel abou.
