CARACAS, AP.- Venezuela a bai di akuerdo ku un finansiamentu pa oumento di eksportashonnan di krudo venezolano rumbo pa China ku un mion barí pa dia. Asina presidente Nicolás Maduro a anunsiá.
Sin duna detaye di loke e plan lo impliká, Maduro a bisa den un konferensia di prensa, desde e palasio presidensial, ku durante e bishita kual a wòrdu realisá siman pasá na China, a sera e akuerdo di finansiamentu di petroli pa asina amplia e produkshon. E no a duna indikashon di kiko e meta di un mion bari pa dia ta.
Sinembargo, Maduro a agregá ku e presidente ehekutivo di e Korporashon Nashonal di Petroli di China (CNPC) lo yega Venezuela djamars pa asina klousurá e plan di oumento di eksportashon di krudo.
Venezuela ta bendiendo 640.000 bari pa dia na e pais.
E industria venezolano petrolero ta enfrentá un situashon kompliká pa e kaida di produkshon, kual ta 1,2 mion bari pa dia, i pa algun difikultat finansiero ku a afektá e pais su plannan di invershon i pago na su proveedor i akreedornan.
Maduro a indiká ku e gobièrnu a establesé un plan pa dupliká e produkshon den un aña, pero e no a ofresé detaye.
Maduro a anunsiá ku China lo duna asistensia den e plan di rekuperashon ekonómiko na gobièrnu.
Venezuela i China a bai di akuerdo pa realisá invershonnan konhunto di 5.000 mion dòler durante un término di un aña. Tokante esaki tambe, Maduro no a duna detaye di e akuerdo i áreanan kaminda e invershonnan ta tuma lugá.
