MADRID, AP.- Hustisia spañó a ninga ekstradishon di un eks empleado di banko HSBC pa kumpli un sentensia di sinku aña na Suisa, kaminda el a wòrdu deklará kulpabel di spionahe ekonómiko pa filtra datonan ku a kousa esena di evashon fiskal na mundu.
Esaki ta di dos biaha ku Oudiensia Nashonal di Spaña ta ninga di ekstraditá Herve Falciani, un franko italiano eksperto den informátika ku a filtra míles di registro di klientenan di HSBC kende a usa e tarifa di interkambio suiso di e banko pa evadí impuesto. El a wòrdu kondená na aña 2015 pa violá e lei di sekreto finansiero na Suisa.
Un pènel di tres hues den Oudiensia Nashonal a blòkia e ekstradishon di Falciani, indikando ku un solisitut anterior di ekstradishon a wòrdu rechasá na 2013, debí ku “spionahe ekonómiko” no ta un delito na Spaña.
E huesnan a bisa ku Falciani no a revelá ningun sekreto debí ku el a kompartí informashon ku solamente outoridat ku a start e investigashonnan den desena di paisnan, inkluyendo Spaña.
Falciani, di 46 aña di edat, a wòrdu arestá pa promé biaha na Spaña na aña 2012. El a pasa 170 dia den prisòn promé ku el a wòrdu liberá. Den aprel, el a bolbe wòrdu detené na Madrid, den un intento di outoridat suiso pa oblig’é pa kumpli ku su sentensia.
Falciani a deklará ku e gobièrnu spañó anterior, kual tabata konservador, a arest’é pa us’é komo moneda di kambio den petishonnan pa ekstraditá polítikonan katalan separatista ku tabata na Suisa.
