ROMA, AP.- Miéntras tabata investigando supuesto mafiosonan pa tráfiko di kokaina, polis italiano a deskubrí dos pintura di Van Gogh skondé den un finka serka di Napoles, kual a wòrdu hòrtá di Museo Van Gogh for di Amsterdam na 2002.
E pinturanan rekuperá a wòrdu presentá djabièrnè durante un konferensia di prensa na Napoles. E direktor di e museo, Axel Rueger, a bisa ku investigadornan italiano a tuma kontakto ku e museo e siman aki i ekspertonan di arte a determiná ku e pinturanan ta outéntiko.
Un di nan, “Bista di laman na Scheveningen” di 1882, ta un di e promé obranan grandi di Van Gogh.
Apesar di e deseonan di e museo, e pinturanan lo no sali di Italia pronto. Esakinan ta evidensia di un investigashon tokante si e mafiosonan tabata tras di e ladronisia original òf si nan a involukrá den esaki despues.
