ARGEL, ARGELIA, AFP.- Por lo ménos 34 persona, inkluyendo 10 militar a muri den kandelanan na nortost di Algeria, ku ainda tabata kimando djaluna, segun indikashon di e ministerio di Interior.
E konteo anterior tabata 15 morto i 26 herido.
Algun sòldat a wòrdu rondoná pa huma durante e proseso di evakuashon di Beni Ksila segun e ministerio di Defensa.
Entre djadumingu i djaluna, Algeria a registrá 97 kandela den 16 region. E kandela mas violento a keda registrá na Bujía, Al Buira i Jijel, segun ministerio di Interior.
Alrededor di 1.500 persona a wòrdu evakuá di e áreanan aki dor di e kandela, ku a wòrdu empeorá pa bientunan fuerte, segun e mesun fuente.
Fiskal general di Bujía a duna òrdu pa kuminsá ku un investigashon preliminar pa determiná e kousanan di e kandela i identifiká personanan responsabel.
Algeria ta sufri di un ola di kalor, ku temperaturanan ku a yega 48 grado Celsius djaluna.
Mas o ménos 8.000 agente di protekshon sivil i 525 trùk a wòrdu desplegá, i nan a haña sosten di forsanan aéreo.
Nort i ost di Algeria normalmente ta sufri di kandelanan grandi den verano, un fenómeno ku a empeorá tur aña di nobo debí na kambio di klima, ku ta kousando sekura i olanan haltu di kalor.
