HERUSALEM, INDEFINI, AFP.- Promé Minister di Israel Benjamin Netanyahu a defendé e voto di parlamento pa un klóusula klave di e pakete di reforma hudisial kontroversial di gobièrnu, miéntras protestanan i preokupashon internashonal ta sigui oumentá.
Netanyahu i su aliadonan di koalishon a aprobá e lei djaluna, despues di un seshon parlamentario turbulento, kaminda parlamentarionan di oposishon a bòikotiá e voto desisivo i ku algun di nan gritando “bèrgwensa, bèrgwensa”.
Krítikonan a bisa ku e reforma hudisial por habri kaminda pa un gobièrnu mas outoritario dor di eliminá kontròl i balansa riba e gobièrnu di Israel.
E lei a pasa ku 64 voto di parlamento ku tin 120 asiento. E lei ta pa limitá e poder di Korte Supremo pa desaprobá desishonnan di gobièrnu ku huesnan ta konsiderá komo “apsurdo”.
E premier a hustifiká e desishon pa kontinuá ku e voto komo un “paso demokrátiko nesesario”.
Washington, aliado tradishonal di Israel, a ekspresá su preokupashon repetidamente relashoná ku e turbulensia polítiko i a deskribí e voto di djaluna komo un desapunto.
E gobièrnu di koalishon di Netanyahu, ku ta inkluí partidonan derechista i ultra òrtodòks hudiu, ta argumentá ku e kambionan proponé ta nesesario pa sigurá un mihó balansa di poder.
