LONDRES (AFP).- Hustisia britániko ku den febrüari último a rechasá pa konsedé protekshon polisial na prens Harry durante di su bishitantenan na Gran Bretania, ayera a rechasá su desishon di bai den apelashon.
Prens Harry, yu menor di Rei Charles III, i su kasá Meghan Markle, a pèrdè e derechi di un protekshon sistemátiko, ku fondonan públiko, ora ku nan bishitá Gran Bretania, despues ku den 2020 nan a disidí na pone fin na nan funshonnan públiko den e famia real i instalá nan mes na California, Merka.
Harry a kuestioná e desishon di outoridatnan pa no dun’é protekshon, despues ku a disidí ku lo studia e punto aki den kada biaha dje prens promé ku tuma eventual medidanan di seguridat.
Na fin di febrüari, Tribunal Superior di Londres a diktaminá ku e desishon ei “no ta irashonal”. Un bosero dje prens na e okashon ei a bisa ku Harry no tabata reklamá trato preferensial, sino simplemente un aplikashon “hustu i legal” dje normanan di protekshon.
Pero Tribunal Supremo ayera a rechasá e punto aki di apelashon dje prens.
Den luna di mei aña pasá, tribunalnan a neng’é e derechi pa benefisiá di protekshon polisial, apesar di su intenshon pa paga esei for di su mes fondonan personal.
E kuestion di seguridat ta un tema hopi sensibel pa prens Harry, ku ta responsabilisá prensa i “paparazzi” dje aksidente mortal di su mama, prensès Diana, na Paris den 1997.
