CUCUTA, COLOMBIA (AFP).- Desena di persona a protestá na e siudat kolombiano di Cúcuta, frontera ku Venezuela, rechasando un ola di violensia ku den wikènt último a laga nuebe morto, inkluyendo un periodista.
Ku bela, blas, bistí ku kamisa blanku i resando, e manifestantenan a reuní dilanti e alkaldia dje siudat i a hisa bos kontra di ”e violensia sin kontròl”.
Polis a registrá nuebe asesinato entre djasabra i djadumingu, den diferente atake. E presidente Gustavo Petro a ordená un investigashon profundo pa por gara e outornan.
Entre esnan asesino a figurá e komunikador Jaime Vasquez, di 54 aña, kende ta abogado i aktivista, rekonosí pa su denunsianan kontra di korupshon den e region.
Vasquez a risibí vários tiru djadumingu den un lokal komersial dilanti di un dozein di testigu, segun videonan di seguridat ku a keda divulgá.
Djasabra, otro tres persona a keda asesiná den un establesimentu komersial den Cúcuta. Polis a informá dje kasonan sin bai den detaye.
E trabou di denunsiá iregularidatnan i echonan di korupshon a pone ku Jaime Vasquez a risibí rekonosimentu amplio komo siudadano.
Segun hustisia kolombiano, e komunikador i lider sosial a keda ataká ku un arma di kandela i tirá vários biaha pa un hòmber ku despues dje krímen a hui riba un bròmer.
E krímen di wikènt último ta bira e di 17 masakre na Colombia pa loke ta bai 2024.
