NEW YORK, MERKA, AFP.- Un eks hefe di narkotráfiko di Honduras a konta djaluna den un huisio pa tráfiko di droga na New York ku e akusado, Geovanny Fuentes Ramirez a inform’é ku e presidente di Honduras, Juan Orlando Hernandez tabata risibí karga di kokaina prosedente di Colombia i “tabata burla di DEA”.
E eks kapo Leonel Rivera, kende tabata lider di e kartel Los Cachiros i kual ta kolaborando ku e gobièrnu di Merka a konta ku e proseso den kore federal di Manhattan ku el a topa ku e akusado na aña 2020 den prizòn metropolitano di New York (MCC).
Segun Rivera, e akusado a bisa ku e “tin prueba, potrèt, i videonan pa mustra kon Juan Orlando, e presidente di Honduras tabata haña e karganan di kokaina di Colombia den aeropuertonan di San Pedro Sula i Tegucigalpa”.
Devis Leonel Rivera Maradiaga, kende a konfesá ku el a mata òf duna òrdu pa mata 78 persona i kolaborá ku DEA dos aña promé ku el a entregá na outoridat merikano na 2015 ta spera ku ta redusí su sentensia di bida largu di mas di 30 aña den prizòn a kambio di su testimonio.
E presidente di Honduras ta sigurá ku e ta inosente i ku Rivera ta gañando pa venga di su kombate kontra narkotráfiko i redusí su kondena.
