BRASILIA, BRASIL, AFP.- E presidente di Brasil, Jair Bolsonaro anunsiá djaluna ku e lo nombra kardiólogo Marcelo Queiroga komo minister di salú, e di kuater persona pa okupá e posishon durante e pandemia di COVID-19.
“Nos a disidí ku lo nombra Marcelo Queiroga komo minister di salú”, segun indikashon di Bolsonaro den un reunion kòrtiku ku sostenedónan na e palasio presidensial. E proseso di transishon lo dura “entre un pa dos siman”, asina el a agregá.
Bolsonaro a haña kritiká fuerte pa e forma kon e gobièrnu a atendé ku e pandemia di Corona vírus. E minister aktual di salú, Eduardo Pazuello a bisa ku e presidente kier remplas’é pa trese kambio den e ministerio.
