NIAMEY, NIGER, AFP.- E mandatario di Niger, Mohamed Bazoum, a wòrdu detené pa miembronan di e guardia presidensial riba djárason, den un intento di gòlpi di Estado kondená pa paisnan afrikano, UE i Merka.
Segun un fuente, ku a pidi pa keda anónimo, “despues di diálogonan, e guardia presidensial a ninga di liberá e presidente i ehérsito a lansa un ultimatum provoká pa e akto di e miembronan di e guardia presidensial, ku a blòkia akseso na e palasio presidensial den kapital di Niamey.
E presidente di e pais bisiña Benin, Patrice Talon, lo biaha pa Niamey pa purba media entre e guardia presidensial i Mohamed Bazoum, segun e anunsio di presidente nigeriano, Bola Tinubu.
Na final di atardi, e guardia presidensial a disolvé manifestantenan sostenedó di presidente Bazoum, ku vários tiru di atvertensia, segun indikashon di un periodista di AFP. E manifestantenan a purba di yega kaminda e mandatario tabata detené.
E sekretario general di Nashonnan Uní (ONU), Antonio Guterres, a papia ku presidente di Niger i a ekspresá “su sosten total i solidaridat”, segun su bosero.
