SANTIAGO, CHILE, AFP.- Míles di maestro di e sektor públiko na Chile a marcha pa promé biaha djárason, bou di gobièrnu di e iskierdista Gabriel Boric, pa eksihí pago di un debe salarial mionario ku e Estado a akumulá desde époka di e diktadura Augusto Pinochet (1973-1990).
E manifestashon prinsipal a transkurí sin insidente na Santiago, kaminda a suspendé desénas di skolnan pa 24 ora.
E dosentenan a sali riba kaya pa pidi pa un pago ku a wòrdu kalkulá na 8.000 mion dòler derivá di un reforma aprobá bou di e gobièrnu militar.
Pinochet a transferí maneho di edukashon públiko for di poder sentral pa e munisipionan.
Pa vários aña e munisipionan a ninga di kumpli ku e ahustenan salarial pa falta di rekurso, ku a afektá e aporte na penshun tambe. Alrededor di 76.000 maestro a wòrdu afektá pa e reforma.
Presidente Boric, ku a asumí e puesto den mart di 2022, a komprometé na pagá e “debe históriko” ku rekursonan di un reforma ku ya kongreso a rechasá. E gobièrnu lo purba rebibá esaki ku un proyekto di lei nobo ku lo wòrdu presentá otro siman.
