MUNICH, AP.- E presidente franses Emmanuel Macron a sugirí djasabra pa Europa mehorá su relashon ku Rusia. El a bisa ku, ounke e no ta proponé pa kita e sanshonnan kontra e gobièrnu ruso, e medidanan aki no a logra konvensé Rusia pa kambia su komportashon.
Macron a bisa durante e Konferensia di Seguridat di Munich ku un enfoke “kreibel” pa negoshá ku Rusia ta pa mustra ku Europa lo no kambia su prinsipionan, pero ku ta dispuesto na bolbe entablá un diálogo stratégiko kual ta tuma tempu.
E relashon entre vários pais Europeo i Rusia a bira tenso desde ku Rusia a aneksá na e península ukraniano di Crimea na aña 2014 i desde surgimentu di e konfrontashonnan entre e gobièrnu ukraniano i e separatistanan respaldá pa Rusia na ost di Ukrania. E konflikto militar aki a laga mas di 14.000 persona morto desde e tempu aki. Merka i Union Europeo a introdusí un serie di sanshon kontra Rusia pa su akshonnan den Ukrania.
E empresanan franses ku ta hasi negoshi ku Rusia a preshoná Macron pa e presidente yuda drecha e relashonnan entre Union Europeo i Moscow i pa redusí e kantidat di sanshonnan ekonómiko.
