TUNISIA, AP.- Presidente di Turkia, Recep Tayyip Erdogan a bisa djárason ku e asuntunan di pas na Siria no por inkluí presidente Bashar Assad, kende el a yama un “terorista”.
Erdogan a papia na final di un bishita di kuater dia na Tunesia, konsentrá riba asuntunan ekonómiko.
Den un konferensia di prensa konhunto ku e presidente tunesio Beji Caid Essebsi, Erdogan a bisa ku Assad ta “un terorista ku a kometé terorismo di estado” i no mester ta parti di e futuro di Siria despues di e guera.
“Kon nos por aseptá un futuro ku un lider sirio ku a mata kasi un mion di su siudadanonan”, asina e lider turko a bisa, kende su pais a risibí un fluho enorme di refugiado sirio durante e guera.
Papiando riba un otro asuntu sumamente delikado den Medio Oriente, Erdogan i Essebsi a bisa ku nan paisnan nunka lo no aseptá kambionan na e status históriko di Herusalèm, despues ku e presidente merikano a rekonosé e siudat komo e kapital di Israel.
