JARKOV, UKRANIA, AFP.- Vladimir Putin a eksihí e rekonosementu di Crimea komo teritorio ruso i e desmilitarisashon di Ukrania komo kondishon pa pone fin na e invashon ku Mòsku a kuminsá kuné i ku tabatin su promé negosiashonnan kara a kara ku Kyiv for di kuminsamentu di e konflikto.
Apesar di e diskushonnan aki, e bombardeonan kontra diferente siudat di Ukrania a kontinuá den e di 5 dia di ofensiva ruso. Na Jarkov e di dos siudat di e pais, por lo ménos 11 persona a muri den atakenan kontra barionan residensial, segun e gobernadó.
E delegashonnan di Mòsku i Kyiv tabata reuniendo durante di vários ora den e region di Gomel, na Bielorrusia serka di e frontera ku Ukrania, i a regresá despues na nan kapitalnan pa konsultanan, asina e hefe di negoshashon ukraniano Mikhailo Podoliak a bisa.
“E partidonan a establesé un seri di prioridat i kuestionnan ku ta rekerí algun desishon”, asina Podoliak a bisa miéntras su homólogo ruso Vladimir Medinski a indiká ku un reunion nobo lo tuma lugá pronto na frontera entre Polonia i Bielorrusia.
