HEMPSTEAD, AP. – Hillary Clinton i Donald Trump ayera tabata den e promé debate kara a kara kaminda nan a diskutí riba komersio, impuesto i kon pa e empleonan mihó pagá ta yega Merka. E demókrata Clinton a bisa ku su rival republikano ta promoviendo un vershon “Trumpeada” di e asina yamá ekonomia di drùpel, un filosofia ku ta usa den liñanan fiskal pa hende riku pa e sèn ei despues pasa pa otro sektornan. El a pidi pa subi salario mínimo, gasta mas den proyektonan di infrastruktura i garantisá un suèldu igual pa hende muhé.
Trump a kaba ku politikanan ku e ta bisa ta provoká ku e empleonan merikano ta keda trasladá pa eksterior debí na akuerdonan komersial internashonal ku Clinton a sostené. ta trata aki di e promé di tres debate presidensial entre e demókrata Hilary Clinton i e republikano Donald Trump ku a kuminsá 9’or anochi i a kaba algu promé ku kuartu pa 11 di anochi.
Donald Trump a papia riba e importansia di lei i òrdu esaki kontestando pregunta di e moderadó riba kon e lo sana e segregashon rasial.
El a bisa ku sin lei i òrdu “nos lo no bai tin un pais”. El a splika ku barionan pober, afro amerikanonan i hispanonan ta bibando un infierno pasobra ta hopi peligroso. Trump a bisa ku si kana den sierto kayanan di Chicago nan ta tira bu. El a sigui sita e táktika kontroversial di polis di “detencion y cacheo” komo un forma di disminuí delinkuensia. “Na e momentunan aki polis tin miedu di hasi kualke kos”, asina el a sigui splika.
Un wes federal a determiná ku e práktika di detené i listra ta inkonstitushonal.
Donald Trump a kulpa Clinton di loke el a kalifiká komo akuerdonan komersial defektuoso ku a kosta hopi empleo na Merka. Trump a bisa ku México ta graba produktonan merikano ku e ta importante pero Merka no ta graba esnan importá di México.
El a bisa ku Clinton a bin ta hasi esaki durante di 30 aña esaki referiendo na su karera largu den polítika na Merka. Durante e tempu ei e tabata promé dama, senado di New York i sekretario di estado. Esei ta e kargonan ku por a permiti’é un partisipashon primario den e desishonnan di akuerdonan komersial.
Den e promé debate aki Clinton a puntra Trump “Kon ta ku bo Trump” ora nan a subi riba esenario. Clinton a tuma e promé pregunta di e moderadó Lester Holt pa loke ta su plan pa krea mihó empleado pa e merikanonan.
Hillary Clinton a akusá Donald Trump di ta laga su mes keda provoká demasiado fásil te pa e por bai evitá ku Merka ta hañ’é involukrá den un guera, kisas inkluso un ku ta involukrá armanan nuklear.
Trump a kontestá “Mi tin mihó kriterio kuné. Mi tin hopi mas mihó temperamentu kuné”. Esaki a asta provoká un harimentu entre algun persona asistente di e debate i motibu pa Clinton bisa “woo, ok”.
