CARACAS, AP.- E protestanan kontra gobièrnu a wòrdu registrá den último tres simannan den e kapital i otro estadonan di e pais. Esaki a laga un total di 26 morto i 437 persona leshoná te ainda. Asina fiskal general, Luisa Ortega Diaz a indiká.
Den último oranan, kuater persona mas a suma e lista di personanan ku a fayesé, loke a oumentá e sifra na 26. Asina Ortega Diaz a bisa na prensa sin ofresé mas detaye. E fiskal a ekspresá preokupashon pa e tenshonnan kresiente i a rechasá pa usa violensia komo arma di akshon polítiko.
Ortega Diaz a indiká ku 1289 persona a wòrdu detené, di kual 65 ta detené i 217 a wòrdu presentá den próksimo oranan dilanti di korte. E anunsio di e fiskal a tuma lugá algun ora despues di e konfirmashon di morto di dos hòmber despues di a risibí tiru den kabes durante diferente punto di manifestashon na Venezuela.
Orlando Johan Medina, di 23 aña, a muri di forma inmediato despues di risibí tiru di un skopèt den kabes durante un protesta den pueblo di El Tocuyo den estado di Lara. Asina Fiskal General a indiká den un komunikado ku el a publiká riba su paginá di internèt.
