CONCORD, MERKA, AFP.- Algun shen persona a protestá den vários siudat na Merka djasabra kontra medidanan imponé pa para propagashon di e Coronavirus, ku motivashon di presidente Donald Trump. Vários ta malkontentu ku e konsekuensianan ekonómiko ku e karentena a laga.
Mas o ménos 400 persona a reuní na Concord, New Hampshire pa bisa ku un ekstenshon di e karentena no ta nesesario den e estado kaminda e kasonan konfirmá di COVID-19 ta mínimo.
Mas di 250 persona a protestá na Texas, pafó di State Capitol na Austin. “A yega ora pa habri Texas bèk, pa laga tur hende bai traha”, asina un aktividat di Young Americans for Liberty a bisa.
Vários demostrashon a tuma lugá dor di e pais kompleto den siudatnan manera Columbus, Ohio i San Diego, California, inkluyendo estadonan Indiana, Nevada, Wisconsin. Masha poko a práktika distansia sosial pero mayoria a waya e bandera merikano.
Merka tin mas kaso i morto di Coronavirus kompará ku tur otro pais na mundu. E pas tin mas di 734.000 kaso di infekshon konfirmá i 38.800 morto desde djasabra anochi.
Mayoria merikano ta bibando bou di òrdunan estrikto di ‘lockdown’ kaminda tur negoshi ta sera ku eksepshon di empresanan esensial.