KHUZAA, GAZA STRIP, AP.- Efektivonan israelí a mata kuater hòmber den e segundo protesta multitudinario den un siman a lo largo di e zona konfliktivo na frontera ku Gaza Strip. Manifestantenan palestinonan a sende tayernan na kandela pa krea un nubia di huma pretu ku ta impedí e bista di frankotiradónan israelí.
E mortonan di djabièrnè a oumentá e kantidat di palestinonan na 26 den último siman aki, inkluyendo 20 manifestante.
Funshonarionan di salú di Gaza a bisa ku 922 persona a wòrdu transportá pa hospitalnan i klínikanan di kampo. 19 persona ta den kondishon grave. Entre e personanan leshoná tabatin ocho muhé i 40 menor di edat, segun e ministerio.
E protesta di djabièrnè tabata e segundo ku outoridat di gobièrnu di Hamas na Gaza a registrá komo mobilisashonnan kontra e blokeo na frontera di e teritorio i ku a dura un dékada. Israel a akusá e grupo islámiko di usa e protestanan komo tapadera pa ataká su fronteranan i a atvertí ku esnan ku aserka e separashon na frontera ta pone nan bida na peliger.
Djabièrnè, míles di palestino a dirigí pa sinku kampamentu di tienda di e kampaña ku organisadónan a instalá, kada un na vários shen meter di e frontera Israel.
Den un kampamentu, serka di e komunidat na frontera di Khuzaa, gruponan chikitu di aktivista a aserká e separashon na frontera despues di orashon di djabièrnè mèrdia.
Un video di The Associated Press a mustra manifestantenan sendiendo pilánan grandi di tayer na kandela, kual su huma pretu tabata protehá nan di frankotiradónan israelí.
