BUENOS AIRES, AP.- Despues ku e aprobashon di un lei pa legalisá aborto na Argentina a frakasá aña pasá, un grupo di legislador lo presentá un proyekto nobo pa legalisá esaki.
E presentashon di e inisiativa den kámara di Diputado lo wòrdu realisá ku respaldo di Kampaña pa Aborto Legal, Safe i Grátis. Esaki lo ta di ocho biaha ku e movementu feminista integrá pa 300 grupo sosial i kreá 12 aña pasá, ta impulsá un proyekto pa legalisá interupshon voluntario di embaraso te ku 14 siman.
Kámara di Diputado a aprobá un inisiativa similar aña pasá, pero Senado a rechas’é. E proyekto a generá diferente marcha na fabor i kontra.
Amnistia Internashonal a kolekta mas di 200.000 firma rònt mundu pa legalisá e práktika aki na Argentina. Esaki ta un di e organisashonnan ku ta forma parti di e kampaña pa aborto.
Presidente Mauricio Macri no a aprobá aborto pero a laga kaminda liber pa diskutí riba e tema.
Segun aktivistanan, mas di 3.000 muhé a fayesé dor di práktikanan ku no ta safe.
Aktivistanan pro aborto a bisa ku anualmente tin entre 300.000 i 522.000 kaso di aborto.
