MOSCOW, AP.- Vladimir Putin a wòrdu reeligí komo presidente di Rusia ku mas di 70% di voto, segun proyekshonnan a base di enkuestanan di e votadónan djadumingu.
“Nos ta un gran ekipo nashonal ku ta destiná pa triunfo”, asina Putin a deklará na su siguidónan desde e senario ku el organisá pa su viktoria.
El a agregá ku e unidat nashonal ta nesesario i a pidi tur hende pa “pensa riba futuro di nos glorioso patria”. Despues el a guia e públiko pa grita “Rusia, Rusia”.
E viktoria elektoral ta impliká ku Putin lo ta seis aña mas na timon na Kremlin. Sinembargo, e elekshonnan a wòrdu denunsiá pa voto falsu i pa intimidashon di e votashonnan, pero e kehonan aki difísilmente lo adekuá outoridat di Putin
E viktoria di Putin no tabata realmente na duda. E desafio tabata logra un márgen sufisientemente amplio pa eksihí legitimidat. Segun enkuestanan, el a haña mas di 70%.
Un enkuesta a indiká ku Putin a gana ku 73,9% di voto. E konsulta aki, di Sentro di Estudio di Opinion Públiko Rusia Kompleto a kuestioná mas di 161.000 votadó den 1.200 munisipio di 68 provinsia ruso, i tabatin un márgen di eror di 3,5 punto porsentual.
