BARCELONA, AP.- Presidente di gobièrnu spañó Mariano Rajoy a mustra su sosten na e manifestashon na Barcelona djadumingu kontra e deklarashon di independensia deklará pa parlamento katalan.
Míles di persona a sali riba kayanan di Barcelona djadumingu, dos dia despues ku parlamento katalan a vota na fabor di independensia di Catalonia, desafiando Rajoy i tribunalnan spañó.
Rajoy a rospondé retirando e gobièrnu di Catalonia. El a disolvé e parlamento katalan i kier organisá elekshon regional nobo.
Un eks presidente di Parlamento Europeo a defendé e intervenshon di Spaña ku e gobièrnu regional di Catalonia despues ku e legislatura a vota na fabor di independensia.
E eks presidente di parlamento a bisa ku si Spaña no a suspendé e outonomia di e sekshonistanan di Catalonia, mas negoshi por a wòrdu trasladá pa otro partinan di Spaña. Aktualmente 1.700 empresa a hasi esaki den último simannan.
E minister di Asuntunan Eksterior di Spaña a bisa ku e lider di Catalonia destituí por postulá pa elekshon regional organisá pa gobièrnu sentral dia 21 di desèmber, si e no wòrdu enkarselá pa e momentu ei.
