WASHINGTON, USA (AFP).- Merka a ekspresá na Venezuela su preokupashon pa e proseso elektoral durante di un reunion sekreto entre ámbos, na poko dia promé ku ekspirá e sanshonnan di petroli i gas venezolano, segun un funshonario di White House a informá AFP. Den òktober di aña pasá, e gobièrnu di presidente merikano Joe Biden a lanta e sanshonnan dje sektor energétiko i oro venezolano den kompensashon pa un akuerdo alkansá entre Caracas i oposishon.
E akuerdo aki ta inkluí e posibilidat pa laga oposishon tuma parti den elekshonnan presidensial di 28 di yüli, den kua presidente Nicolás Maduro ta aspirá un di tres mandato.
Pero for di e momento ei e prinsipal rival di Maduro, Maria Corina Machado, a keda sin posibilidat di partisipashon i Corina Yoris, nominá pa sustituí Machado, tambe tin’e difísil den e e situashon ku a surgi.
No kontentu ku e situashon, Washington vários biaha a atvertí ku si Caracas no kambia di rumbo ku lo bin bèk ku sanshonnan, someté na un periodo di seis luna ku ta vense dia 18 di aprel awor.
“Nos por konfirmá ku tabatin un reunion”, segun bosero di Konseho di Seguridat Nashonal ku a pidi pa keda anónimo.
“E meta tabata pa ekspresá nos preokupashon riba e proseso elektoral di Venezuela”, el a bisa, sin ker a bai den detaye.
Segun prensa, e reunion a tuma lugá e siman aki na México.
Ounke ku Venezuela tin e reservanan di petroli mas grandi di mundu, e pais ta produsí “solamente” 800.000 bari di petroli krudo pa dia, un kuart di e 3 mion ku nan tabata produsí te un dékada pasá.
Merka, ku ta konsiderá komo un froude e re-elekshon di Maduro den 2018, ya a reaktivá den yanüari e sanshonnan relashoná ku oro di Venezuela despues ku e Tribunal Supremo di Hustisia a mantené e inhabilitashon dje polítiko Maria Corian Machado.
