NASHONNA UNI, USA (AFP).- Alrededor di 100.000 persona a hui dje zona metropolitano di Port-au-Prince den e último luna debí na e oumento di atakenan di gèngnan armá, segun a keda anunsiá ayera pa e Organisashon Internashonal di Migrashon (OIM) di Nashonnan Uní.
Segun e datonan akumulá na e stashonnan di bùs mas usá, OIM a konstatá ku entre 8 di mart i 9 di aprel, 94.821 persona a hui for dje kapital pa dirigí nan mes prinsipalmente pa e departamentonan di Gran Sur, ku ya tin 116.000 hende ku a hui den e último lunanan.
E sifra anterior a informá di 53.000 hende ku a hasi e kambio entre 8 pa 27 di mart. E sifranan, sinembargo, no ta mustra e movishon kompleto, ya ku algun dje hendenan ta pasa via di otro puntonan di salida.
Haiti tin dékadanan kaba den pobresa, ku katastròfnan natural, instabilidat polítiko i violensia di gèngnan armá.
For di final di febrüari, gèngnan poderoso a uni pa ataká wardanan di polis, prizònnan, aeropuerto i e haf dje pais den un intento pa fòrsa e salida dje promé minister Ariel Henry, kende dia 11 di mart a disidí na retirá pa habri kaminda pa un komishon di transishon. Pero formashon dje komishon ainda no a keda konkretisá.
