DUBLIN (AFP).- E presidente di gobièrnu spañó, Pedro Sanchez, kende a bishitá Noruega i Irlanda ayera ku e speransa di haña apoyo pa e rekonosimentu di Palestina komo estado, a logra haña e kompromiso di tur dos pais europeo.
Despues di a logra den oranan di mainta, ku eskala na Oslo, pa uni na su kousa e promé minister noruego, Jonas Gahr Store, den oranan atardi na Dublin tambe el a logra e apoyo di e irlandes Simon Harris.
“Nos ta kere ku e momento ta aserká. Nos a pensa ku ta importante pa avansá ku e otro paisnan pa ora ku e momento adekuá yega”, segun e mandatario irlandes, di sentro derecha, despues di e reunion.
E presidente sosialista di gobièrnu spañó a respaldá e palabranan dje mandatario irlandes. “Komunidat internashonal no por yuda Palestina si no ta rekonosé su eksistensia. “Nos dos su paisnan a disidí pa públikamente rekonosé Palestina komo un estado na momento ku e kondishonnan ta apropiá i apoy’é komo pais miembro ku pleno derechi den Nashonnan Uní”, Sanchez a bisa.
Harris a ekspresá su mes den e mesun términonan. “E pueblo di Palestina durante di hopi tempu a buska e dignidat di su mes pais i su soberania, un kas, manera Irlanda i Spaña. Nan mester por okupá na lugá entre e nashonnan na mundu”, segun e mandatario irlandes.
Despues di a reuní ku e mandatarionan di Noruega i Irlanda, ta e intenshon di Sanchez pa otro siman topa ku mandatarionan di Portugal, Slovenia i Bèlgika ku e mesun meta di buska apoyo pa e rekonosimentu di estado palestino.
Segun e presidente spañó, “Irlanda i Spaña ta di akuerdo ku otro. Mester kaba ku e violensia. Netanyahu no tin un plan di pas. Nos mester hinka nos mes den e situashon i aportá pa yega na solushon pa e teribel situashon. “Bira kara no ta aseptabel”, Sanchez a bisa.
