MOSCOW, RUSIA, AFP.- Rusia a disidí djamars ku lo inisiá “e prosedimentu di salida” di Konseho di Europa, akusando NATO i Union Europeo (UE) di a kombertí esaki den un instrumento di servisio di “su ekspanshon militar, polítiko i ekonómiko di Ost”.
“E notifikashon di retiro di Federashon Ruso di e organisashon” a wòrdu entregá na su sekretaria general djamars, Marija Pejcinovic Buric, segun un komunikado di ministerio di Eksterior di Rusia riba su kuenta di Telegram.
Den su komunikado, diplomasia ruso ta akusá e institushonnan di Konseho di Europa i tambe Korte Europeo di Derechi Humano (CEDH), su instansia hudisial, di a wòrdu “usa sistemátikamente pa ehersé preshon riba Rusia i entremeté den asuntunan di interior”.
Un dia despues ku Rusia a inisiá su ofensivo de Ukrania riba 24 di febrüari, Konseho di Europa a disidí ku lo suspendé partisipashon di Rusia den diferente órgano, ku eksepshon di CEDH, e último rekurso pa 145 mion siudadano ruso.
