JUCHITAN, MEXICO, AP.- Gobièrnu mehikano a informá djaluna ku e sifra ofisial di morto pa e temblor na Mexico a subi na 96, despues di a konfirmá mas morto pa e desaster den estadonan Oaxaca i Chiapas.
Sekretaria di Relashon Eksterior a bisa ku 95 persona a muri den vários estado di e pais pa e temblor di magnitut 8,1 djaweps. E direktor di defensa sivil na Chiapas, Luis Manuel Garcia Moreno a bisa mas despues ku e mortonan aki a subi di 15 pa 16.
E gobernador di Oaxaca, Alejandro Murat, a bisa na kanal Milenio di Televishon ku e saldo einan a subi na 76 morto. Outoridat a reportá kuater morto den estado di Tabasco, den kosta di Golfo.
Kansier a agregá ku e temblor i orkan Katia a obligá Mexico pa retirá su oferta di yudansa pa Houston, asotá pa orkan Harvey den ougùstùs.
Merka a gradisí Mexico pa e oferta i a bisa ku e pais mester di yudansa logístiko so. Krus Kòrá mehikano a bisa ku 33 di su voluntarionan ta yuda den otro tareanan di reskate na Houston.
Mexico a bisa ku e lo dediká su rekursonan na su propio desasternan.
Mas o ménos 5.000 kas na Chiapas a keda kompletamente destruí. Ainda outoridatnan ta sigui inspekshon n’e kasnan na Oaxaca djaluna, kaminda nan ta sperando mas daño.