SEUL, SUR KOREA, AP.- Samsung Electronics a informá djadumingu ku e lo resiklá partinan di su telefòn Galaxy Note 7 ku tabata un frakaso, pa usa nan di nobo den e modèl ku lo sali djabièrnè próksimo na Sur Korea.
Telefòn, Galaxy Note FE, ku ta usa partinan nobo di e Note 7, lo kosta 611 dòler, tres kuart parti di su preis original.
E kompania a menshoná ku e lo bende 400.000 unidat i ku e Note FE ta “kompletamente safe”.
E modèl original, Note 7, tabata un di e frakasonan mas grandi den historia di e kompania. Su lansamentu a tuma lugá den ougùstùs 2016 i tabata un di e telefònnan mas karu di e kompania surkoreano, ku preisnan riba 850 dòler.
Sinembargo, despues di algun tempu vários a demandá e kompania debí na baterianan di e telefòn ku tabata bira kayente i sende na kandela. Samsung a retirá e modèl di merkado den e luna ku el a wòrdu lansá i a saka un otro ku diferente bateria ku tambe tabata bira kayente. Esaki ta e motibu dikon e kompania a deskontinuá e modèl di e telefòn aki.
Samsung a gasta miónes di dòler pa retirá e modèl i purba mehorá su imágen. Na komienso di aña, e kompania a kulpa e fayonan na dos fabrikante di bateria.
Despues di preshon di parti di aktivistanan ambiental, Samsung a bisa ku e Note FE ta parti di su esfuersonan pa minimisá e residuonan.
