LONDON, AP.- Polis britániko a anunsiá djadumingu ku ta investigando tres akusashon nobo di abusu seksual kontra e produktor merikano di sine Harvey Weinstein. Tur a wòrdu hasi pa e mesun muhé.
Polis Metropolitano a informá ku e agreshonnan a pasa den 2010, 2011 i 2015. Polis a agregá ku agentenan di Komando kontra Abusu di Menor i Delitonan Seksual ta investigando. E nòmber di e muhé no a wòrdu publiká.
Scotland Yard no a menshoná Weinstein spesífikamente, pero bisa ku e señalashonnan ta inkluí un hòmber ku a wòrdu akusá pa otronan.
E aktris Lysette Anthony a denunsiá na polis djárason ku Weinstein a viol’é den su kas na London na final di dékada 1980. Anthony a bisa na e korant Sunday Times ku el a keda “disgustá i bergonsá” despues di e atake.
Den dianan resien, desena di muhé a denunsiá Weinstein pa agreshon seksual. Algun di e kasonan ta datá di vários dékada atras. Weinstein ta sigurá ku e relashonnan seksual tabata konsensuá.