SCHNECKSVILLE, USA (AFP).- E problemanan legal kresiente di Donald Trump ta un motibu mas pa duna apoyo na e eks-presidente, segun partidarionan ferviente faltando algun dia pa inisio di un huisio históriko kontra dje lider republikano.
Reuní den e siudat chikí di Schnecksville, na Pennsylvania, den nortost di Merka, e partidarionan a bisa di ta kere ku Trump lo sali dje proseso mas fuerte ku nunka.
E multitut, desafiando bientu hopi friu i algu di áwaseru, for di den oranan di mainta a kuminsá reuní pa tende e eks-presidente den oranan di anochi, miéntras ku e ta hasi kampaña rumbo pa elekshonnan di 5 di novèmber den kua lo e enfrentá e aktual mandatario demokrat, Joe Biden.
“Nan a akusá mi komo si fuera mi ta Al Capone, e gran gangster”, Trump a bisa na e públiko. “Aki no tin apsolutamente nada. No tin un delito chikí, no tin delito grave, no tin delito federal”, el a bisa,
Awe Trump lo komparesé dilanti di un tribunal di New York pa atendé ku e akusashonnan di falsifikashon di registronan komersial den un plan pa enkubrí un supuesto enkuentro seksual ku e aktris porno dje tempu ei Stormy Daniels, pa evitá ku esaki den 2016 lo a perhudiká su elekshon komo presidente.
“Nan ta krusifikando Trump. Nan ta kombirtié den un martir. I e demokratnan ta kere ku asina nan lo gana… e úriko kos ku nan ta logrando ta pa nos rabia mas tantu”, segun Edward Young, un hòmber di 64 aña di edat.
“Ta importante dun’é nos apoyo, pero tambe mustra ku e sistema hudisial ta korupto”, segun un otro fanátiko di Trump
Otro kasonan penal kontra di Trump, manera su supuesto skondementu di dokumentonan di sekreto haltu na Florida despues di a bandoná White House komo tambe su implikashon den intento pa anulá elekshonnan di 2020, ta enfrentando hopi retraso.
Segun otro fanátiko, “Trump ta stima e pais… pues e no tin mester dje trabou aki. E por biba kómodamente pa sobrá di su bida. E ta un hòmber riku”, segun e fanátiko a duna di konosé.
