MANILA, FILIPINA, AFP.- Por lo ménos sinku persona a muri den un temblor ku un magnitut di 7,0 grado ku a sakudí nort di Filipina djárason. Pero habitantenan den kapital di Manila, mas ku 300 kilometer di e episentro, tambe a sinti esaki.
E temblor ku no tabata profundo tabatin su episentro den provinsia di Abra, riba e isla prinsipal Luzon, segun Servisio Geológiko di Merka.
E temblor fuerte a provoká mas ku un sentenar di herido den e region i a daña edifisionan i kòrta koriente.
Dos trahadó di konstrukshon a muri den provinsia di Benguet, i un muhé di 23 aña a fayesé despues ku un muraya a kai riba dje den provinsia di Abra, kaminda a registrá por lo ménos 78 herido. Seis persona ta gravemente heridá.
Outoridatnan a informá ku un ansiano a fayesé despues ku un avalancha di tera a der’é. A registrá por lo ménos 58 avalancha di era den e region, segun indikashon di e sekretaria di Interior, Benjamin Abalos.
