GINEBRA, AP.- Un ola di friu ekstremo den Europa kompleto a kobra mas bida djaweps, obligá siere di aeropuertonan den Eskosia, Suisa, Fransia i Irlanda i a laga sentenar di shofùrnan pegá riba kamindanan tapá ku sneu.
E sneu i bientunan fuerte a para tur buelo ku tabata drenta i sali di aeropuerto di Dublin, kaminda outoridat a bisa ku no ta probabel ku esakinan ta wòrdu reanudá te djasabra. E empresa di riel Irish Rail a bisa ku ta probabel ku no tin trein djasabra.
E pronostikadornan a bisa ku un tormenta nobo lo trese, bientu di 100 kilometer pa ora, áwaseru i tormentanan eléktriko na Irlanda, sùitwèst di Inglatera i Gales djaweps mas lat. Medionan di komunikashon sueko a informá ku un muhé ku a bandoná su kas den un sentro di asilo ku su yu muhé i hòmber, di 8 i 9 aña di edat, a wòrdu deklará morto den e hospital, despues di a wòrdu hañá den mondi.
Polis danes a bisa ku un ansiano ku demensia di 84 aña a kombertí den e segundo persona ku a muri den e pais debí na e friu.
Tabata un káos kompleto pa purba biaha den aeropuertonan europeo òf riba esakinan su kareteranan.
E aeropuerto di Ginebra a sera durante tres ora djaweps despues di registrá un kapa di 13 centimeter di sneu. Esaki a habri despues ku e pista, avion i instalashonnan a wòrdu despegá di e sneu aki.
E sneu a obligá pa sera aeropuertonan di Glasgow i Edimburgo, na Eskosia, i tabatin kanselashonnan na Heathrow i otro aeropuertonan britániko.
Sentenar di shofùrnan a keda pegá den nan outo durante oranan di anochi na Eskosia, i outoridat a pidi pa tur hende keda for di riba kaya pa asina servisionan di emergensia por a trafiká sin problema.
