BERLIN, AP.- Pa segundo dia konsekutivo, un tormento wenter a asotá Europa djamars, kapturando sentenar di persona den regionnan alpina, kousando tardansa i kanselashonnan di buelo i generando miedu di mas avalancha di sneu.
Por lo ménos 12 persona a muri den insidentenan relashoná ku sneu den Europa durante e último siman aki. Mayoria di e mortonan a wòrdu kousápa avalancha.
Na Noruega, e intentonan di rekuperá e kadaver di kuater persona ku tabata ski a wòrdu suspendé debí na mal visibilidat i sneu intenso. Outoridat ta teme ku un sueko di 29 aña i tres finlandes di 29, 32 i 36 a fayesé despues di un avalancha fuerte den un vaye serka di siudat Tromsoe.
Na Oustria, sentenar di residente mester a keda den kas debí na kamindanan ku a keda kompletamente blòkiá. Tabatin blackout den algun region debí na palunan ku a kai riba wayanan di koriente.
11 aleman a wòrdu reskatá den seru kaminda nan tabata keda debí ku no tabatin elektrisidat i skarsedat di kuminda. Algun persona a muri den avalanchanan na Suisa, Oustria i Alemania i outoridat a atvertí kontinuashon di mas sneu i riesgo di avalancha.
Ulanda a wòrdu asotá ku bientu fuerte. KLM a kanselá diferente buelo rumbo pa i desde siudatnan europeo.