KABUL, AP.- Sòldatnan merikano ta bandoná Siria i ta dirigí pa wèst di Irak i lo sigui realisá operashonnan kontra grupo Estado Islámiko, segun indikashon di e sekretario di defensa merikano.
E sekretario, Mark Esper, kende a yega e kapital afgano djadumingu, no a deskartá e idea ku forsanan merikano a realisá mishonnan antiterorista na Irak i Siria.
Su komentarionan ta un di e proménan ku a señalá spesífikamente unda e sòldatnan merikano ku sali Siria lo bai.
E akontesimentunan ta ilustrá ku un di e argumentonan di presidente Donald Trump pa retirá e sòldatnan di Siria lo no bira realidat den futuro. “A yega ora pa nos sòldatnan bini kas”, asina Trump a afirmá djárason.
E Ministerio di Defensa di Turkia a bisa ku un sòldat a fayesé den konfrontashon ku kombatientenan kurdo. Trump a duna òrdu pa saka 1.000 sòldat merikano for di Siria despues ku presidente turko Recep Tayyip Erdogan a indiká klaramente den un yamada telefóniko ku su forsanan lo invadí Siria pa pa saka forsanan kurdo, kende Ankara ta konsiderá komo terorista.
E retirada a laga kurdonan praktikamente nan so, kende a bringa kontra Estado Islámiko huntu ku forsanan merikano durante vários aña. Entre 200 i 300 sòldat di Merka lo keda na puesto Al-Tanf, na sùit di Siria.
Esper a señalá ku e sòldatnan ku yega Irak lo tin dos mishon. “Un di nan ta pa yuda Irak i e otro ta pa realisá un mishon kontra EI miéntras nos ta establesé próksimo pasonan”, asina el a komentá.
