MADRID, AP.- Polis spañó a logra saka un supmarino supuestamente yená ku algun tonelada di kokaina for di awa i pone esaki riba tera firme.
E supmarino a senk despues ku outoridat a purba konfiská esaki djadumingu na Galisia, na nortwèst di e pais. no ta evidente si e tripulashon a laga esaki senk intenshonalmente. Outoridat a arestá dos miembro di tripulashon.
Labornan pa saka e supmarino for di awa a kuminsá djaluna pero a keda suspendé debí na mal kondishon di klima.
Outoridat ta indiká ku ta promé biaha ku ta usa un supmarino pa hinka droga den e pais. Sambuyadónan di polis a saka un pakete di kokaina for di e supmarino djaluna.
Prensa lokal ta indiká ku tin 3 tòn di kokaina den e supmarino, pero outoridat no a konfirmá esaki. Polis ta buskando un terser miembro di tripulashon ku ta fugitivo. E agensia tin algun dia ta monitòr ruta di e supmarino ku koperashon di polis internashonal.
Outoridat no a bisa di unda e supmarino ta bini, pero segun prensa lokal, polis ta sospechá ku ta di Colombia.
