SIUDAT DI MEXICO, AP.- México a wòrdu sakudí pa un temblor hopi fuerte den su historia, kual a mata por lo ménos 60 persona. E temblor a pasa djaweps 23:49 dilanti kosta sùit di e pais i a basha kasnan i negoshinan abou. Ademas, esaki a provoká pániko ta ku mas di 1.000 kilometer di distansia.
Segun servisio Geológiko di Merka e episentro tabata 165 kilometer na wèst di Tapachula, den estado sùit di Chiapas. E magnitut tabata di 8.1, algu mas ku e temblor di magnitut 8 di 1986 ku a destruí Siudat di México i mata míles di persona.
E gobernador di Oaxaca, Alejandro Murat, a bisa djabièrnè ku por lo ménos 23 persona a muri den su estado, serka di e episentro, i funshonarionan di protekshon sivil a informá ku dos mas a fayesé den estado di Tabasco, den Kosta di Golfo di México.
Atardi, e gobernador di Chiapas, Manuel Velasco, a informá ku dies persona a fayesé einan. Durante mardugá, Velasco a pidi esnan ku ta biba serka di kosta pa bandoná nan kas. El a agregá ku tabatin dañonan den hospital, skol, brùg i kareteranan, ounke e no a duna mas detaye.
Na Tabasco, gobernador Arturo Nunez a detayá ku esnan ku a fayesé tabata mucha.
