AUSTIN, TEXAS, MERKA, AP.- E gobernador di Texas, Greg Abbott a bisa djaweps ku e ta wardando pa estado haña mas di 50.000 mion dòler den fondo federal pa lidia ku e desaster ku Harvey a laga.
Abbott a bisa den un konferensia di prensa ku esnan desplasá pa e orkan por pidi yudansa via supsidio di desaroyo komunitario ku ta kubri nesesidatnan di kas riba término largu, ademas di kostonan temporal miéntras nan ta warda nan kas pa wòrdu drechá.
E gobernador a bisa ku Kongreso i Kas Blanku a inform’é ku lo aprobá tres pakete federal adishonal di yudansa pa víktimanan promé ku fin di aña. Kongreso a aprobá 15.300 mion dòler pa tareanan inisial di rekuperashon.
Abbott a bisa ku kasi 4.000 kas i otro instalashonnan tin elektrisidat despues di e tormento, kual a mata mas di 70 persona. 52 skol a sufri “dañonan katastrófiko” den e estado kompleto i no por habri bèk.
