HOUSTON, MERKA, AFP.- E gobernador republikano di Texas, Greg Abbott a anunsiá djamars ku lo anulá e uso obligatorio di tapaboka i lo habri tur negoshi indikando ku e di dos estado mas poblá di Merka tin “tur medio nesesario pa protehá” su pueblo kontra Coronavirus.
“Kuminsando djárason, tur negoshi di tur tipo por habri ku 100% kapasidat”, segun indikashon di e gobernador den un dekreto “ku ta pone fin na uso di tapaboka den e estado kompleto”.
“Pa motibu di avansenan médiko di e vakunanan i tratamentunan antikuerpo, Texas tin sufisiente medio pa protehá su habitantenan kontra e vírus”, segun gobernador Greg Abbott. “Nos ta sigurá ku tur empresa i famia den Texas tin libertat pa determiná nan propio destino”.
Segun e norma nobo, e empresanan por limitá e kapasidat di nan negoshi òf establesé protokòlnan di salú.
Kasi 44.000 persona a muri di COVID-19 den Texas desde komienso di e pandemia, segun datonan di Universidat Johns Hopkins.
