BALTIMORE, AP.- Tres hòmber arma a tira i herida 8 persona, entre nan un mucha di 3 aña, durante di un tiramentu den kaya den un sektor di Baltimore djasabra anochi, asina polis a informá. E agresornan a hui koriendo i ta spera ku tur e víktimanan lo sobrebibí.
E tiroteo a sosodé mei mei di un seri kas den kareda di mitar di 9 di anochi, despues ku tres hòmber a aserká e grupo for di diferente direkshon, asina komisario di polis di Baltimore Kevin Davis a bisa durante di un konferensia di prensa. E tiroteo tabata un akto premeditá di represaya ku ta kontesta di otro tiramentu registrá riba “dia di Labor” kaminda un persona a muri i otro dos, inkluyendo un muhé na estado a resultá heridá, asina David a splika, kende a akudí na e lugá di delito. E komisario no a splika ki relashon e insidentenan tin ku otro.
E víktimanan a rekonosé e agresornan, ounke outoridatnan no por a identifiká esakinan den promé instante i tabata buska te den lat ayera. E mucha di 3 aña ku su tata tabata pará na un distansia di e grupo i nan no tabata ophetivonan deliberá den e atake asina e komisario a splika. Banda di e mucha i e muhé, e otro víktimanan tur ta hòmbernan di entre 26 i 39 aña asina Davis a splika.
