HOOVER, ALABAMA, MERKA, AP.- Polis mester a duna asistensia despues di a haña notifikashon ku un pelea a tuma lugá den un sentro komersial na Alabama. Akinan outoridat a tira un hòmber i a herida un otro. Un mucha muhé di 12 aña tambe a resultá heridá segun informashon di agentenan djabièrnè.
E deportamentu di polis di Hoover a bisa den un deklarashon ku e dos hòmbernan a konfrontá otro den un “alterashon físiko” den e plasa komersial elegante di Rierchase Galleria na Hoover. Un di e dos hòmbernan a saka su pistol i a tira e otro dos biaha.
Dos polis di seguridat den e sentro komersial a skucha e tirunan i a akudí pa determiná kiko ta pasando. Akinan, un di e sospechosonan tabata dirigiendo un arma riba e otro. Na momentu ku polisnan a mira esaki, e hòmber a wòrdu batí. El a muri na e sitio. Su nòmber no a wòrdu revelá, pero polis a bisa ku ta trata di un hòmber di 21 aña residente di Heuytown.
E otro víktima ta un hòmber di 18 aña, di Birmingham. El a wòrdu transportá pa hospital den kondishon grave. Un mucha muhé di 12 aña ku tabata serka di e insidente, a wòrdu alkansá pa un bala. El a wòrdu hospitalisá i ta den kondishon stabil.
Polis a bisa ku e pelea a pasa riba e segundo piso di e sentro komersial.
Kapitan Greg Rector a bisa den un konferensia di prensa ku e investigadónan no a determiná motibu di e disputa entre e dos hòmbernan. No tabatin mas herido i e sentro komersial a habri normal riba djabièrnè.
