PARIS, AP.- E direktor di un skol sekundario i dos persona mas a wòrdu heridá den e skol na sùit di Fransia djaweps i un studiante di 17 aña sospechoso pa tira nan a keda detené. Asina outoridat a informá.
E atake den skol Alexis Tocqueville a provoká konmoshon den Grasse, e kapital pintoresko di e perfume franses ya ku e klas di insidentenan aki no ta normal den e pais europeo. Un funshonario di polis nashonal a bisa ku no tin motibu pa sospechá di un konekshon terorista i aparentemente no tabatin mas sospechoso, ounke polis kier a “kita tur tipo di duda”.
Aparte di esnan heridá, kende nan bida no ta na peliger, sinku persona a risibí tratamentu pa shòk, asina el a agregá.
E studiante, kende su identidat no a wòrdu publiká, tabatin vários arma na momentu ku el a keda detené despues di e atake, segun e funshonario.
Durante e atake, algun alumno a skonde den e skol i algun a hui. Un helikòpter polisial tabata bula den e zona kual a wòrdu será kompletamente.
Bosero di ministerio Interior, Pierre-Henry Brandet, a bisa ku tur alumno ta safe. El a agregá ku ainda nan no sa motibu di e atake aki. Fransia ta den estado di emergensia despues di un serie di atake ekstremista islámiko ku a laga sentenar di morto den e dos último añanan.
