DENVER, AP.- E hòmber ku a mata un polis di Colorado i heridá kuater mas, ademas di leshoná dos sivil, tabata un abogado veterano di Guera di Irak ku a publiká videonan riba Internèt resientemente. E videonan aki tabata kritiká agentenan di òrdu i profesornan di lei, segun indikashon di outoridat djaluna.
Mathew Rielh, di 37 aña, a muri djaluna den loke outoridat a deskribí komo un atake den e edifisio di apartamentu kaminda e tabata biba den Highlands Ranch, 28 kilometer na sùit di Denver.
Outoridat a bisa ku Riehl a tira mas di 100 biaha den su apartamentu promé ku ekipo SWAT a logra mat’é.
Zackari Parrish, komisario di kondado Douglas, tambe a muri.
Riehl a haña atvertensia di outoridat tokante su videonan kaminda e ta papia di profesornan di Universidat di Wyoming i di ofisialnan di lei di Colorado.
No opstante, apesar di inkietutnan tokante su salu mental, aparentemente ofisialnan no por a evitá violensia.
Ademas di esakinan, Riehl a publiká un video riba YouTube dia 13 di desèmber kaminda e tabata bisa ku e kier sustituí e hefe di polis lokal di Douglas, Tony Spurlock.
E tiroteo a kuminsá kasi mesora i e agentenan a wòrdu tira “hopi rápido” despues di drenta den e apartamentu pa purba papia ku e sospechoso.
E agentenan heridá a purba saka nan kompañero ku a fayesé, Zackari Parrish, pero nan propio leshonnan solamente a permití nan pa “lastra i buska un lugá safe pa skonde”, asina Spurlock a agregá.
Tur esnan heridá, ku eksepshon di Jeff Pelle, di 32 aña, a risibí atenshon médiko i por a bai kas despues.