BRUSELAS, BELGUKA, AFP.- Bèlgika a duna òrdu pa sera horeca durante kuater siman i a imponé un toke de keda pa kontené e kasonan di COVID ku ta oumentando.
Promé minister Alexander De Croo a anunsiá e medidanan ku ta drenta na vigor djaluna, atvirtiendo ku e kasonan di Corona vírus ta oumentando eksponensialmente.
E region di Bruselas a duna òrdu pa sera horeca siman pasá, pero e anunsio di djabièrnè ta konta pa e nashon kompleto.
E restrikshonnan nobo di djabièrnè ta inkluí un toke de keda di meianochi pa 5 or di mainta, i prohibishon di benta di alkohòl despues di 8 or di anochi. E medidanan ta pa prevení organisashon di fiesta na kas.
Bèlgika a reportá 191.959 kaso di COVID i 10.327 morto te ku ayera.