BIRMINGHAM, ALABAMA, MERKA, AP.- Kasi 150.000 kas i negoshi na sùitost di Merka a lanta sin koriente djabièrnè despues ku un tormenta poderoso a pasa lagando por lo ménos sinku morto.
Mayoria blackout a tuma lugá na Florida, segun e wèpsait poweroutages.us. North i South Carolina, Georgia i Virginia tambe a wòrdu afektá i desde djaweps anochi tabatin un atvertensia pa warwarú desde Florida te ku North Carolina.
Servisio Meteorológiko Nashonal a atvertí djabièrnè mainta ku e sistema di tormento a sigui bira fuerte den e zona atlántiko i a desplasá rumbo pa nort ku hopi áwaseru, sneu i bientu fuerte.
Outoridat a pronostiká ku por ferwagt te ku 20 centimeter di sneu den sierto parti di Virginia Oksidental, kaminda a suspendé lès di mitar di e estado. Aparte di esaki a pronostiká bientu di te ku 88 kilometer pa ora desde kapital di e nashon te ku New Jersey.
E tormenta a destruí diferente kas na Mississippi i Alabama, provokando avalanchanan di lodo na Tennessee i Kentucky i a inundá e lokalidatnan di Apalache.
E gobernador di Virginia, Ralph Northam a deklará un estado di emergensia djaweps anochi debí na áwaseru fuerte i inundashon ekstremo den diferente zona. Outoridat a konfirmá ku tabatin sinku víktima moral di e tormenta na Alabama, North i South Carolina i Tennessee.
